Almennir skilmálar Huldu Margrétar Óladóttur ljósmyndara
Almennir skilmálar þessir taka gildi þann 1. janúar 2020.
1.1. Allur höfundaréttur að ljósmyndum er í eigu Huldu Margrétar Óladóttur (hér eftir jafnframt vísað til sem „ljósmyndara“).
1.2. Um höfundarrétt ljósmyndara gilda höfundarréttarlög nr. 73/1972.
1.3. Afhending ljósmynda til viðskiptavinar felur lögum samkvæmt ekki í sér framsal á höfundarrétti ljósmyndara né veitir hún heimild til breytinga á ljósmyndum.
1.4 Myndirnar eru til einkanota og ekki leyfilegt að nota þær í auglýsingaskyni eða annarrar birtingar nema samið sé sérstaklega um slíkt.
2.1. Við myndbirtingar á netinu þarf að geta nafns ljósmyndara í texta (@mention) og merki/„taggi“ myndina með síðu ljósmyndara.
2.2. Óheimilt er að fjarlægja logo ljósmyndara af myndum til notkunar á netinu.
2.3. Óheimilt er að skera eða klippa til myndir undir neinum kringumstæðum, á netinu eða annars staðar.
2.4. Óheimilt er að breyta myndum á nokkurn hátt eða setja þau í gegnum snjallforrit með „effectum“ líkt og Instagram og sambærileg forrit bjóða uppá. Ekki er heimilt að rita á/yfir eða skrifa ofan í verkið, skera til eða breyta því á annan hátt.
2.5. Öll prentun (stækkanir, albúm/ljósmyndabækur,chromaluxe, strigar, jólakort og þess háttar) skal fara í gegnum ljósmyndara.
2.6. Viðskiptavinir mega ekki undir neinum kringumstæðum prenta sjálfir eða láta aðra en Huldu Margréti ljósmyndara prenta fyrir sig án leyfis.
2.7. Óheimilt er að gera eftirmyndir af ljósmyndum nema með leyfi viðkomandi ljósmyndara. Viðskiptavinir þurfa því að snúa sér til ljósmyndara og panta eftirmynd frá honum.
3.1. Viðskiptavinur samþykkir að ljósmyndari birtir ljósmyndir á ljósmyndasíðum sínum og merki/„taggi“ viðskiptavin og tengda aðila þeirra á birtar ljósmyndir. Viðskiptavini er þó heimilt að óska eftir því að samráð verði haft við hann um val á myndum til birtingar og hvort ljósmyndir verði merktar/„taggaðar“. Viðskiptavinur er samt sem áður heimilt að óska eftir við ljósmyndara að myndir verði ekki birtar vilji hann það síður.
3.2. Ljósmyndunin, myndvinnsla og varðveisla ljósmyndanna fer fram að beiðni viðskiptavinar. Viðskiptavinur staðfestir með undirritun sinni á skilmála þessa að hann samþykkir ljósmyndun, myndvinnslu, varðveislu, birtingu, merkingu og aðra vinnslu ljósmyndanna í samræmi við skilmála þessa, sbr. lög um persónuvernd og vinnslu persónuupplýsinga nr. 90/2018.
3.3. Viðskiptavinur velur sjálfur þær ljósmyndir úr myndatökunni sem hann vill kaupa. Og vakin er athygli á því að mögulegt er að kaupa aukamyndir úr hverri myndatöku, verð á aukamyndum fer eftir gildandi verðskrá hverju sinni.
3.4. Stafrænar ljósmyndirnar afhendast eingöngu í vefupplausn.
4.1. Viðskiptavini ber að greiða ljósmyndara gjöld fyrir þjónustu og vörur samkvæmt gildandi gjaldskrá ljósmyndara hverju sinni, sem finna má á heimasíðu ljósmyndara.
4.2. Við pöntun á myndatöku ber að greiða 7.000 kr. í staðfestingargjald sem fæst ekki endurgreitt sé liðin meira en 3 dagar frá pöntun. Myndataka telst ekki vera bókuð nema staðfestingargjald hafi verið greitt.
4.3. Greiðsla fyrir hverja myndatöku skal fara fram strax að myndatöku lokinni.
4.4. Verð á auka myndum fer eftir gildandi gjaldskrá ljósmyndara hverju sinni þegar þær eru pantaðar.
4.5. Vörur og ljósmyndir úr myndatöku eru ekki afhentar nema öll greiðsla hafi borist.
4.6. Gjaldtaka fer fram í gegnum fjölskyldufyrirtæki ljósmyndara Kop ehf. kt.660111-0690. VSK nr. 136523.
Viðskiptavinur samþykkir skilmála þessa með því að koma í viðskipti hjá ljósmyndara.
Brot á höfundarrétti ljósmyndara og skilmálum þessum varða við höfundalög, sbr. gr. 1.2, og áskilur ljósmyndari sér allan rétt vegna slíkra brota.
Viðskiptavinir eru hvattir til að kynna sér kostnað við myndatökur, eftirvinnslu á stækkanir á myndum áður en pöntun er gerð.
© 2021 Hulda Margrét Óladóttir
